زى ما يكون قلبها حاسس...قصدى ماما... صدق اللى قال ان ماما ليها اربع عيون و 20حاسة..لو سألت نفسك مين اللى قال كدة هقولك أنا..
كنت لسة مفيش عاملة الموضوع الاولانى و ابص الاقى بعد يومين و انا قاعدة مع ماما فى ساعة صفا.. و كانت بتكلمنى ساعتها عن القسمة و النصيب الاقيها بتقولى عارفة فلانة بنت فلانة.. انتى عارفاها طبعاً.. و عارفة جوزها.. عارفة اتعرفوا على بعض إزاى؟؟؟ إزاى يا ماما إزاى؟؟؟
راحت بنت فلانة لمامتها الشغل عشان يروحوا سوا.. و هما مروحين راحوا للبقال اللى قدام الشغل يشتروا مكرونة...آل اية الراجل البقال اول ما شاف البنت اتهبل و راح كلم مامتها عشان يتقدملها هتقولولى طب و هوا يعرف مامتها منين؟؟؟ هقولكم ان هوا القبال اللى قدام الشغل و كل يوم او كل يومين مامتها تروح تشترى من عندة حاجة طبيعى طبعاً..
الراجل دة بقى و يااااللصدف كان بيساعد فى الدكانة عشان يكون نفسة و البنت يا عينى و يااااللصدف كانت اليوم دة فايتة على مامتها تروح معاها....الصدف الصراحة فوق احتمالى...
انا الظاهر منحوسة و لا اية؟؟؟الصدف الحلوة دية بتحصل لكل الناس الا أنا... حقد بقى انا حقودة أعمل اية..
واحدة بنت محافظة لا بيها و لا عليها راحة الشغل أول يوم... و من أول ما راحت و هى ملاحظة ان فية واحد بيبصلها... قالت مش مهم يمكن عشان واحدة جديدة بقى و الكل عايز يعرفها و يتعرف عليها كزميلة.. تلاقى البنت بعد شهر الزميل دة اتقدملها...اية يا عم فية اية؟؟؟ أصل من أول ما شوفتها و هى ملكت قلبى... وعششت فى نغاشيش قلبى او نخاشيش قلبى مش عارفة..يعنى هوا مفيش بنات الا فى الشغل و مفيش غير البنت دية..
حضرتك روحت المدرسة و اخدت دروس و روحت الجامعة اللى مليانة بنات وروحت الجيش اتمرمطت.. و خرجت من الجيش صيعت شوية وشوفت بنات العالم و متجيش تحب الا البنت الجديدة اللى جت الشغل و من أول نظرة؟؟؟!!! يا عينى....just like that
طب ما انا روحت الشغل حصل اية بقى؟؟؟ و لا حاجة...أدور هنا و أدور هناك... الا ما فى حد حتى رفع عينة مش بقولكم منحوسة...
بقولكم اية انا هجرب اروح اشترى مكرونة من البقال اللى قدامنا و اشوف اية اللى هيحصل... و هعمل ان شاء الله دراسة عن تأثير المكرونة على قلوب البشر..بس ابقوا ادعولى
ملحوظة هامة جداً......
المواقف التى تحدثت عنها كلها حقيقية لكن فى الاجزاء التى اتحدث فيها عن نفسى و افكارى..و ما افعلة هذة الاجزاء فى بعض الاحيان قد لا تكون حقيقية..و ذلك للعلم
و شكراً..
الإثنين ديسمبر 22, 2008 10:53 am